請選擇 進入手機版 | 繼續訪問電腦版
 找回密碼
 立即註冊
2013-1-18
談消氏亂估電影票房---《十二生肖》


朋友也有聽開風消消,一直唔抵得消氏&一班擦鞋仔的九噏(尤其是on大陸問題)。見我近來少評論他們的九噏,走嚟踢我。我話有D get tired of it,正如林x陽話齋,「一認真你就輸」,有時唔嬲得咁多。但朋友叫到,又整返一兩段,先講下電影。

前天(16-01-13)消氏又講人票房,朋友話,呢位老細無次準,好心收吓口啦!同時事後永冇檢討估錯的,唔知醜字點寫。上一輪直情發文《蕭若元: 成龍三億成本的《十二生肖》真是難以歸本》(#788),估《十二生肖》香港票房唔過千萬,大陸會收四億到,結果《十》片爆冷---香港收千二萬,大陸收八億幾。朋友話,估輸估嬴本來好閒啫,呢位老細衰在事後提都唔提下,輸打嬴要,事前懶實牙實齒咁,事後八萬五。

我此前評斥消氏第一天估《十》片大陸票房,不在於四億元這個數字。坦白講,四億元在大陸已是高收入票房了(相對上)。我評斥消氏,在於他第一天(20-12-12)未過完就話《十》片「今天在國內大約可以收三千多萬」,十分冇sense。佢扮內地院線票房專家,未埋數就可以知道結果(中國太大,唔似香港可以由日塲收入預收日收),好無謂。結果《十》片第一天收¥4350萬,消氏預估誤差千幾萬。

同時,假如估大陸收四億元,海外都有三億到(成龍片有埠),咁《十二生肖》點會「真是難以歸本」呀?消氏連數都唔識計,就咁武斷?(更不要說《十》片成本會報大數了---成龍自己起碼mark美金1.5千萬片酬啦)

消氏第二點冇sense係,在踩成龍的tone下,將「大約可以收三千多萬」講成低數字咁。消氏時常係咁,選擇性評論,近乎糊弄(hustle)聽眾。查三千多萬開晝,是個高數字,合作片最高收入的《鐵甲飛龍》(總收5.2億) 開晝也是三千多萬而己。

假如是無意識地糊弄(聽眾),是無知,假如有意地糊弄(聽眾),是欺騙了。朋友話,係消氏一貫講古佬/賣藥佬脾性啫,慣咗站在最叻高地上講嘢啫,以後都唔會改者也。做得佢嘅聽眾,要忍受得住至得。

分享至 : QQ空间
收藏
INSAFE System
關閉

3 個回復

倒序瀏覽
舊電影人 管理員 2022-9-4 03:09:43
沙發
INSAFE System
關閉
亂評亂估之二:《一代宗師》

好叻,到咗前日(16-01)評《一代宗師》,又嚟叻,在踩人的tone下,話《一》片係大陸開畫收三千零萬,第二日「直仆落嚟」(!?)貪口爽,何必咁呃聽眾?網上大把內地票房資料,叫鬼食泥查下就得,連本欄(#799)都有數字登載啦。查《一》片第一日收¥2990萬,第二日收¥2300萬。而首周收1.69億,平均日收2.4千萬,並無「直仆落嚟」。講開,行內預估《一》片埋單會收3億到,影片成本連宣發大約為1.2億元,外埠有價,估計《一》片會大賺千萬元計----假如不計時間成本。

消氏在節目中預估《一》片在香港會收千七萬到,這是唯心的。朋友話,呢位老細估別人永遠襟低,估自己嘢永遠抬高(估錯後永遠唔會認)。消氏此前預估自己的《一路向西》過硬二千萬,結果收千九萬;預估《天生愛情狂》收七八百萬,結果收六百萬到。

消氏在噏節目時,《一》片已上晝至第九天,都唔去Check走勢。查《一》片以百三萬元開畫;周六沖到日收三百多萬;四天過八百萬;一周過千萬,成績大大好過消氏的《一路向西》。盲都睇到《一》片埋單將會勝於《一路向西》,點會唯心地、懶有料到地話《一代宗師》只能收千七八百萬呢?(利申:我一向不是王家衛fans,佩服他的技藝,但不喜歡他的電影)。
回復 使用道具 舉報
舊電影人 管理員 2022-9-4 03:10:17
板凳
INSAFE System
關閉
評論大陸電影欣賞生態----不要大鄉里

朋友話,唔明消氏點解未睇過《一代宗師》,會去評論其內容。係節目中,于非話片中功夫好勁,消氏(語氣)不以為然,于非O哂咀。風消消節目時常出現這種撞介氣氛,十分反智,聽眾又嬲唔得咁多。

消氏又miss-read《一代宗師》on大陸side,唔多知道大陸電影欣賞生態。其觀念及論點十分落伍。朋友奉喻消氏多去睇下大陸網站,大陸電影文化同香港電影文化是完全不同的。《一代宗師》一片在大陸有熱烈談論氣氛,比香港談論有深度。朋友話,消氏一向被人視為智者,但結果可能被人視為愚者---在認識上是大鄉里----不要淨坐在錄音室內觀天了。
回復 使用道具 舉報
舊電影人 管理員 2022-9-4 03:10:40
地板
INSAFE System
關閉
消氏終於改口話《一代宗師》係收二千萬嘅戲,前幾日預估的收千七八萬又八萬五了。佢繼續話《一代宗師》係大陸映,1/3觀眾中途離場,咁話。好心收下把口啦,不要隨意地造謠啦!(有乜謂呢?)我非王影片goers,以事論事,《一》片在大陸入場的情況,在大陸網站上,隨處可見,不要造謠。

注:《一代宗師》不是沒有觀眾中途離場,但不要用1/3觀眾這種誇張詞句,坦白講,冇觀眾中途離場的,就不叫王家衛電影了。老消的主觀願望用語,不厚道:"《一代宗師》(係大陸)票房第二日直仆落嚟",倘是,唔會兩個禮拜收兩億五的。
回復 使用道具 舉報
您需要登錄後才可以回帖 登錄 | 立即註冊