2007-7-23
邵氏官僚程序

(續鋤邵氏公司)

最令我印像深刻的是邵氏服裝庫(非服裝部)，成個飛機場庫咁嘅空間(或者我當時錯覺)，外面是鐵門，裡面開足泠氣，有數仟件服裝分幾層排列，連老外都大讚是亞洲第一庫(當年我跟中西合作片)。

但這是個服裝墳場而不是服裝庫，因為把守此庫的是一位廣東話不正的老乾婆----全廠聞名的何姑姑，何莉莉(今屆港姐評判)的姑姑。

她的職責可能大概主要是「趕客」，千方百計不讓劇組人員順利取衣----注意順利二字。我記得有一次的理由竟是：「D衫洗好哂燙好哂…，唔好整污糟呀，拿去拍中彈，唔得！」(大意)。整個服裝庫好似她私人擁有，不準人碰她的baby。

她一個老太婆(我印像中)，叫她爬高爬低找衣(唔知點解只得一個人)，於心不忍(劇組人員不準自已找衣) ，她又一付晚娘臉，於是冇乜人肯去幫襯(自已用辦法外借)。於是惡性循環，何姑姑鐵門深鎖攬墳自重(平時真係唔開門的)，好多人唔知邵氏有呢個部門。

邵氏.電工組

何姑姑這個case我想過好耐，再諗番，這是邵氏深層次仆街處。Miss方一味釘住D婆乸數，cut cut cut！一方面邵氏公司結構爛入骨髓，但無去理。原來好似何姑姑這些老臣子，邵氏每個部門都有，睇做唔做野。

我最記得電工部門主管的阿乜叔，個子小小，但氣派之大，好似掌握住整個影城命運一樣。連方小姐對他都温言相向，據說此老和六叔共過患難，六叔金口說過不會炒此人者。此老目中無人(我或者誤會，但當年是這種印像) ，我猜測，另一個原因是電工組(lighting man) 是片塲中最惡的一組，人又多(廠景10人) 。惡人組的阿頭當然惡。

邵氏.道具部.厨房數

有D老臣子主管唔係無做野，但無能。好似道具部門的雙主管阿叔(古裝及時裝) ，好似永遠處於焦頭爛額的情景中。

我當時係中西合作片可以落order的人員，我永遠忘不了我踏入道具房他們的面寃表情。深究下去，他們是低層出身，他們的道具知識，已應付不了中西合作片。港產片的「土法錬鋼」是行業陋習。

講返何姑姑patern，我猜測這些老臣子主管肯定Low-pay，卻眼見劇組人員落格貪污，自已又無份，所以無形中仇視劇組人員(是我主觀猜測)，佢地唔諗下，落格貪污只是少數人。

仆街者，方逸華絕不會郁這些老臣子。SB人都知，方小姐好像大權在握，但掌權者還是六叔。況且方亳無管理頭腦及魄力。邵方是古寒財主阿二揸數模式---僅揸厨房數。

我說的是道具部主管，一般道具工更無論矣，他們是道具擺設工，沒多少人有道具設計概念。大佬，人工有幾多呀？

好多時道具設計由導演效勞，徐克是箇中高手。

邵氏.睇毛片捉咖喱啡人數

(講返「簫鼓聲中」所提到的)。

?睇毛片(rush print)捉咖喱啡人數啱唔啱數，言之鑿鑿。但據記憶，方逸華很少看毛片的(好嘥時間的)，中意看片(應該是first cut) 是六叔。講都唔信，六叔當時是仲管影片內容的-----聽講TVB拍包靑天(90年代)，落命令的是六叔。六叔愛電影懂電影(商業) ，方逸華不懂電影-----愛用半桶水的導演的立塲，來要求商業效果。六叔則是純生意人。

但說方逸華用定格數咖喱啡，是誇張。老簫可能唔熟技術，放片時不可能定格(不是VCR)，一停機(不熄燈) 就燒片。定格是在黑房造，好貴的。

邵氏.七日鮮

梁錦祥說「七仙女」七天拍起，他對片廠電影可能無概念。國語片不同七日鮮的粵語片。一堂景拆搭拍起碼廿天，一部戲起碼幾堂景。就算走廠快-----如老簫所說的楚原古龍片，也要卅四十組一部戲。

程剛的「天網」拍了兩年。我經歴的只有楚原的「七十二家房客」(1973)，一堂景數天搞掂。另一個情况是，搶拍，幾個導演一齊拍一部戲，數天搞掂。

邵氏.六叔不是導演

老簫說六叔做導演拍第一部中國有声片「白金龍」，有誤。該片導演應該是他大哥邵醉翁。記憶中，六叔是不碰導演這一瓣的，他(早年)是戲院佬(含放映員) ，假如他是第一個中國有聲片導演，歴史唔同寫法。

"...方逸華不懂電影-----愛用半桶水的導演的立塲，來要求商業效果......"

外行充內行，實死。

舊電影人講得好精彩, support 你繼續分享!

邵氏.內行但做極外行

(#49)

>>外行充內行，實死。<<

我前貼批評方小姐，對小姐評價不高，可能過於簡略。但點都好，斷斷不能用外行充內行來形容小姐，她事實上就係呢一行，自1974年就係head of production of影城，在荷李活叫片廠studio大亨，她不是一個外行人。(但做極都外行，另計)

我前貼係將佢同六叔比較，係將佢放係總栽代表的高度來要求。做得呢個位，其實好簡單，第一，識用人，或識炒人。第二，唔好教導演拍戲，但要求導演賺錢(或欏獎) ，唔得，夠膽炒導演。

坐得呢個位，「老板mind」重要過「導演mind」，要識睇戲，但千祈唔好話自己識拍戲，因為好大鑊，老板話識，伙計無得做，更大鑊者，不要半桶水。

方小姐.production mind

聽講邵邨人(邵氏父子公司)就夠奸，一九五幾年請年輕傲慢的李翰祥拍戲時，話自己係生意佬，乜都唔識，叫「李先生幫忙」。據《從頭細說卅年》一書所述，李翰祥後來才嚇然發覺這個老板編過十幾個劇本，係大行家！

我同方小姐接觸唔多，但略知其production mind，就係「不懂管理電影-----愛用半桶水的導演的立塲，來要求商業效果..... 」，指其不懂管理，不是指其唔識睇戲，不是指其唔識拍戲---佢可能係一個好導演，you never know！我印像中，佢心目中乜野都好容易做，意思係唔好嘥錢。

佢絕對係係行內，亦內行(check咁耐數，點會外行)，但卻用外行手法做CEO---好似乜都識兼行「唔support下属」政策---當片塲友個個落格兼唔做野。

話講回來，方是個聰明兼精明的女人。我諗，佢係一個事務形高手，唔係一個謀略家。但始終係歌女出身(並無岐視性) ，四十餘歲才任大位，師奶D。同班導演坐而論道(指how to shoot)，睬你好定唔睬你好，方小姐始終學唔到邵邨人個一套。

佢衰在上面有個六叔，好似江青學老毛咁搞政治，有料但唔係個一班----比如正正經經做個女製片，可能更會發揮自我。

邵氏.電影潮流

Enterprise網友說「實死」(邵氏) ，其實唔關方逸華事，責任仍在六叔身上。

自七十年代中開始，邵氏其實已經脫離香港娛樂主流。戰後出生一代的電視人潮(許冠文作代表) ，己取代了外江佬把持的國語片潮。六叔和方逸華等外江佬幾時認識過香港社會？他們知道乜叫香港娛樂口味？那時邵氏就奠定「死實」。

1980年新浪潮一出，邵氏曾參與搶簽新浪潮導演(當時老簫亦被吸納)，意圖反攻，但舊即係舊，尤如西太后答應行憲，無結果的。

邵氏.電影大亨唔識揀戲拍

做大片廠大亨，最重要係識揀戲拍，大亨唯一職責是揀戲拍。識揀賣座戲拍。鄒文懷講過，蝕八九部唔怕，一兩部就返黎。無論係有心開拍好，無心撞正好，一定要有幾部big hit。

我思疑方逸華由頭到尾都無成功過揀戲 (指big hit)--- 有請指出來(劉家良的算不算？)，六叔後期仲有親自落order叫狄龍拍TVB包青天，方小姐有乜呢？或者老簫可以講吓，1981年老簫入邵氏做過策劃，相信二人在創作上brain stormed過。

到2003年左右，方逸華仲叫舊臣劉家良拍「鐵馬騮」，嚇死人無命賠，可見她沒有「揀戲拍sense」。Enterprise網友說的「外行充內行」可以改為「外行心態管內行」，十個大亨都會炒，奈何她是大大亨的老契(後成妻子) ，邵氏影城遂成香港風中神話，垂四十年，你吹咩！